Loka Dhaddhi Tora: Sanja'na Agus Widiey

Taresna Se Ta' Dhapa'

Taresna se ta' dhapa' dha' ka dika

Akherra tapatre dhalem okara neka

Saengga tada' caretana lobhar

Dila bula kadung niser

Koma aeng mata se gaggar

Naleka makan pagghun sabbhar

Le 'bula ongghu taresna

Ngarep dika saomorra

Tape dika ta' enda' ngarte

Nganggeb bula koma mempe.

Songennep, 2021

Loka Dhaddhi Tora

Dhari loka ka loka

Aeng mata dhaddhi tora

Tora jha' dika

Banne tang taresna

Se samorra.

Songennep, 2021

Bhala' Kerrong

Etaon se pon tapongkor

Tepa' ojan toron ngalotor

Aeng mata bula noro' ngalocor

Makan petteng tadha' nera'e

Rassa kerrong ekeba ka mempe

Mekkere beremma se tatemmoa pole

Angen dhateng dhari daja

Angen raja akeba mardha

Rowa' se ekoca' bhala' kerrong

Se dhateng sajjekka dika laban bula ta' apolong.

Songennep, 2021

Kembhang Dhalem Makan

; Alfiayah

Dika kembhangnga makan

Se bhakal langgeng sampe' mate

Mekkar ekonco'na rassa

Tor maro'om salanjhangnga taresna.

Songennep, 2021

Lebat Sanja'

Lebat sanja' bula se kenal dika

Kenal dha' okara taresna

Lebat sanja' bula kenal taresna

Taresna se bhakal dhaddhi tora

Lebat sanja' bula norae robana dika

Sajekka pornama nyonar e adha'na mata.

Songennep, 2021

Agus Widiey, Laher e topote 17 Mei 2002. Nyantre e pondhuk Nurul Muchlishin. Menangka santrena KH. Ach Zaini Pakondhang, Rubaru, Songennep, Madhura.

Share this post